Ich (de Andi) han ade Uni Züri Wirtschaft, gnauer gseit BWL, studiert. Da werded jetzt vilicht einigi d'Nase rümpfe und säge "Ou nei BWL, das isch doch nur stupids uswändig lerne..."

Sicherlich gits es paar Fächer, wo das tendenziell e chli so isch. Ich han mich aber vorwiegend für die zahlelastige Fächer vode BWL interessiert, also Sache wie: Accounting, Controlling, Auditing und (Corporate) Finance...

Nachdem ich im Summer 08 mini Bachelor-Arbeit gschribe han, isch mir im Oktober de "BA UZH in Economics and Business Administration" verliehe worde. Mitem erfolgriich Abschluss vo mim Bachelorstudium isch unweigerlich d'Frag verchnüpft gsi: Wie wiiter? Master oder id Privatwirtschaft go schaffe? Will mich de BWL-Master ade Uni Züri nöd würki überzüüge hät chöne, han ich mir da scho einigi Gedanke müese mache...

Schliesslich han ich mich entschide, mal chli uf de Gschmack vode rauhe Arbeitswält z'cho! Es 6-monatigs Praktikum binere Wirtschaftsprüefigs-Gsellschaft hät mir ihdrücklich zeigt, dass es na e (Wirtschafts-) Wält näbed de Uni git (genannt Praxis). Wie's bi mir in Zuekunft söll wiiter gah, erfahrsch unter Schiber schaffet...

De GioGio studiert sit em Herbscht 04 au a de UZH, gnauer gseit am Institut für Informatik (IFI) in Züri Nord.

Deht lernt er sehr cooli sache wie JAVA, Roboter-boue und programmiere, Datebank-System und Modellierig, aber au e chli müehsami Sache wie Numerik ;)