Studente-Jöbli

Als Student hät mer ja einigermasse vill "vorläsigsfreie Ziit" [Achtung, nöd z'verwächsle mit: Ferie - ab und zue sött mer na für Prüefige lerne, Arbete schriibe, etc.].

Zudem isch mer meistens chronisch knapp bi Kasse. So chunts, dass mer immer wider uf Studente-Jöbli ahgwise isch. Wills vo dene aber eigentlich immer vill miesi git (sch... Arbet, völlig unterbezahlt) mues mer amigs froh si, wänn mer öpis guets gfind!

So isches mir glücklicherwiis ergange: Ich han während minere Studie-Ziit amigs ide Summerferie für e Grossbank därfe go Banknote zähle und Goldbarre biege (isch würki wahr, nöd g'loge oder übertribe). So han ich mir au als Student ab und zue chöne tolli Ferie leischte, öpis schöns poschte oder im Usgang so richtig uf de Putz haue... :-)

Nachem Studium

Nachdem ich nach mim Bachelor es 6-monatigs Praktikum bi EY (Ernst & Young) gmacht han, isch mir de Entscheid (ob Master oder nöd und wänn ja; wo...) relativ eifach gfalle.

Will die 6 Mönet bi EY so unglaublich lehrriich und spannend gsi sind und mir d'Materie, woni demit z'tue gha han, so zuegseit hät, isch für mich nach dem Praktikum klar gsi: Für mich isch di 4jährig Usbildig zum dipl. Wirtschaftsprüefer genau s'Richtige!

Gesagt getan: Abem Nov. 2009 bini fescht bi EY ahgstellt und wird im Summer 2010 mini Usbildig zum WP ahfange...