Am 5. Sep. 2006 treffed mer eus am Morge am HB in Züri und mached eus uuf zure schöne, aber au aastrengende Reis. Nachere churze Zugfahrt chömed mer bald in Linthal ah. Ab jetzt gilts ernst: Rucksack buggle, d'Schuebändel namal ahzieh und dänn gaht's los!

Ufstiig

Z'erscht laufed mer chli s'Tal hindere, allmählich dänn aber am Hang entlang schräg ufwärts dur schöni Wälder. Nach und nach wirds aber düütlich steiler und mir chömed scho s'erscht mal is Schnuufe! Die erscht Herusevorderig stellt sich eus dänn au scho gli binere Passage wo's ade Felswand Drahtseili hät, womer sich hebe chan (zu dere Ziit hämer na nöd g'ahnt, was na alles uf eus zuecho söll...). Nachere churze Rast miteme schöne Usblick über s'Glarnerland gaht's dänn namal chli ade Seili wiiter, bis mer schliesslich uf enere Alp ahchömed. Bis zu dem Punkt hets au es Transportbähnli gha, wo allerdings nur 3mal täglich

                                                     fahrt. Mir händ eus aber bewusst fürs laufe entschide, mit andere Wort für 1000

                                                     Extra-Höhemeter ;-)

Ab deht häts dänn au 2 verschideni wiiteri Wäg gäh: en liechte dur en chalte, tropfende, füechte Tunnel zum Stausee und en schwärere, wo aber fantastischi Usblick büütet. Natürlich händ mir eus für de 2. Wäg entschide, obwohls g'heisse hät, de Wäg seg nur für "schwindelfreie Berggänger"! Dänn isches aber erscht so richtig losgange: Dä schmal und steili Wäg hät mitte dur d'Felswänd dure g'füehrt und es hät di meist Ziit wider Sicherheitsseil gha. Das hät eus aber nöd so vil usgmacht, will mer mitere atemberaubende Ussicht bzw. Tüüfblick belohnt worde sind. Mir wäred zwar na fascht verdurstet, will eus unterwägs s'Wasser usgange isch (mer chan ja irgendwie au nöd 5 Liter Wasser de Berg ufeschleppe). Aber zum Glück gits ja ide Berge au ab und zu mal en Bach...

Übernachtig

Nachdem mer öppe 8-9 Std. (Marschziit) unterwägs gsi sind und knapp 2000 Höhemeter überwunde händ, sind mer dänn am frühe Abig ide Muttseehütte ahcho. Deht händ mir natürlich beidi gfunde: Jetzt händ mer eus MINDESTENS eis Bier verdient! Mir sind au chli überrascht gsi über d'Usstattig vode Hütte. Zum Bispiel hät's Bett mit Chüssi und Duvet gha. Und au de Znacht isch eus kochet worde! Verständlicherwiis händ mer aber a däm Abig nüme lang möge und sind scho gli go pfuuse.

Im Hochgebirge

Am neue Tag sind mer zur Ziit ufgstande und händ widerum es wunderbars Tägli vorgfunde. Nacheme churze Zmorge isches wiitergange Richtig Kistepass. De Wäg deht ane isch eigentlich meh oder weniger grad-us gange (aber im Hochgebirge heisst grad-us halt chli öpis anders wie susch). Mir sind alles am Limmeresee entlang gloffe (nöd am Ufer, sondern öppe 800 Höhemeter) obedra) und händ debii s'Türkis vom Wasser und s'Wiis vom Gletscher gseh. Chli später sind ide Ferni au na es paar Steiböck z'erkänne gsi. Schliesslich händ mer dänn de Kistepass erreicht, was au de Übergang vom Glarnerland is Bünderland bedüüted hät.

Abstieg id Surselva

De wiiter Wäg hät eus verbii am Kistestöckli, obe am Val Frisal bis zum Alp Dado gfüert, wo mer im Winter amigs au mit de Ski unterwägs sind. Deht händ mer dänn au scho de fascht fertig neui Lift gseh. Nacheme Schluss-Effort sind mer dänn ändli z'Andiast im Feriehuus vom Andi sine Eltere ahcho. Das isch würkli en wunderbare Momänt gsi. Trüebt hät di ganz Ahglägeheit nur, das mer na es paar chlini Sächli bruucht händ und drum is Dorflädeli füre sind -  und das usgrächnet a dem Tag zue gha hät ! Das hät für eus dänn halt gheisse: na mitem Posti uf Ilanz abe go poste. Aber wie mer gseht händ mer au das überläbt!

Als Fazit chan mer festhalte, dass es ächt e mega tolli Wanderig gsi isch. Vor allem d'Kombination us super Wätter, sportlicher Heruseforderig, Abertüür (Ädväntschär) und Natur/Berge isch eifach de Hammer gsi! Ich bin mir sicher das isch nöd eusi letscht gmeinsam Bergtour gsi!

Und jetzt na es paar Bewiis-Föteli unter "Schiber knipst"